Најголем дел од пишувањето денес, во ерата на дигиталните уреди, е типкање на физичка или виртуелна тастатура. Но, остануваат секојдневните поводи кога инстинктивно посегнуваме по пенкало и хартија, за најсигурно да спасиме од заборав некоја тукушто добиена, важна идеја или информација.
Ова се ситуации во кои секое пенкало ќе ја заврши работата. Но, има моменти кои бараат од инструментот за пишување поверно да го направи преносот од умот и срцето до хартијата. Кога сакаме и во нашиот ракопис да се огледува она што го мислиме и чувствуваме додека пишуваме.
Или ситуации кога во одредени пенкала гледаме многу повеќе од функционални предмети; чија убавина лансира во метафизичките сфери, до искуства од повисоки нивоа кои прават да се препуштиме во уметноста на живеењето.
Ваквите пенкала се и симболи, кои ја одразуваат нашата автентичност, окото со кое ја гледаме убавината, во суптилната комуникација со себе и со светот.
Во оваа смисла изборот на вистинското пенкало е деликатна работа – од огромната понуда да се најде токму она што ‘материјално’, функционално, одговара на нашите потреби, а ‘нематеријално’ ја одразува нашата внатрешна убавина.
Без разлика дали бараме инструмент за пишување за честа, секојдневна употреба, или за ретки пригоди како потпишувања на важни документи, постои пенкало за секого.
Во продолжение прочитајте за карактеристиките на различните инструменти за пишување, што може да ви помогне да го направите вистинскиот избор.
-
Пенкало (Ballpoint pen)
„Обичните“ пенкала (ballpoint pens) се уверливо најкористени меѓу инструментите за пишување. Благодарение и на тоа што се најуниверзални и најдостапни.
Пишуваат со густо мастило базирано на масло, кое трае долго: и после години некористење, во најголем дел од случаите, со малку распишување пенкалото ќе продолжи да пишува течно како некогаш.
„Обичното“ пенкало функционира така што неговото мастило кое во патронот е во форма на густа паста, се разредува кога е изложено на триење при ротацијата на топчето што е дел од механизмот на инструментот. Вртејќи се, ова метално топче го пренесува мастилото на хартијата, кое брзо се суши.
Одберете го овој инструмент ако вашите потреби се секојдневно, интензивно пишување, зашто нуди брзина, издржливост и наједноставно користење.
-
Ролер (Rollerball pen)
Ролерот е варијација на „обичното“ пенкало зашто го користи истиот механизам со ротирачко топче за да го пренесе мастилото на хартијата.
Но, кај ролерот мастилата се потечни, на водена база (кај некои ролери се користи и гел), па хартијата полесно ги впива, што овозможува и со помал притисок (со инструментот врз хартијата) да се постигнат подолги, континуирани потези.
Елегантниот ефект на напишаното со ролер (кој особено доаѓа до израз на мазна хартија) е споредлив со оној на налив перата.
Изберете ролер ако сакате она што го пишувате да изгледа подекоративно, поекспресивно; и секогаш внимавајте да го затворите неговото капаче после употреба, зашто мастилото што го користи за да ја постигне споменатата елеганција, може брзо да испари.
-
Налив перо (Fountain pen)
Налив перото е аристократот меѓу инструментите за пишување чија престижност го прави автоматски избор за специјални пригоди.
Нуди најголем простор за креативна експресија и најдиректно чувство на интеракција со хартијата.
Функционира така што мастилото го навлажнува перото со ефикасна дистрибуција овозможена од гравитацијата и принципот на капиларност. Влажноста на налив перото е причина мастилото побавно да се суши, односно најпогоден медиум за него да биде апсорбирачка, потешка хартија.
Како и кај ролерите, мастилото на налив перата е на водена база, што ја овозможува леснотијата на пишувањето, но значи и дека почесто треба да се дополнува. Што за вистинските љубители не само што не е проблем, туку е и задоволство кое им дава можност да бидат инволвирани во животот на својот инструмент за пишување.
Во овој дух, за да го испорача најдоброто од себе, налив перото бара почит и грижа од својот сопственик. Не трпи запоставување, па во случај да не се користи подолго време, а во него остане заборавено мастило, истото може да се исуши и да направи непоправлива штета.
За да го постигнете саканиот ефект на ракописот со вашето налив перо, потребен е и период на запознавање со неговиот карактер. Трикот за да добиете најдобар резултат е да го користите под низок агол, колку што е потребно за со долната страна на перото да ја допирате хартијата.
Штом почнете да го користите, перото почнува да добива облик во зависност од вашиот стил, додавајќи дополнителен комфор во ритуалот на пишување. За да се избегне ризикот од деформирање на перото, позајмувањето на овие деликатни инструменти за пишување, не е препорачливо.
